Janji Pilkada

Oleh : Ilyas Bagok

Salam alaikum kaom sinaroe
keu rakyat nanggroe dusun ngen kuta
nyopat na bacut uloen pesampoe
haba jih menoe beu neutem baca

Loen cuba rawi na bacut kisah
Dua ribeei tujoh blah katrok pilkada
Calon pemimpin pi ka meurupah
rakyat geupapah dukungan geumita

Dari gubernur hingga bupati
Jinoe ka mulai suson keureuja
Lee that nyang hawa neuk ek bupati
Geupeugoet janji ngen macam cara

Na nyang meuhasut atau meucaci
Na chit hai akhi pamor geumita
Na nyang mat proyek modal geucari
Neuk ek bupati neuk mat kuasa

Na ladom rakan bak warung kupi
Supaya dituri geupgah haba
Geupegah haba menoe geu rawi
Menye loen bupati korupsi hana

Loen peugoet jalan di kota idi
Geusyik uloen bi na saboh honda
Keu tgk imum uloen bi gari
Pegawai negeri moto toyota

Keu bapak mukim honda suzuki
Keu sagoe loen bi proyek raya
Panglima laot loen bi scoci
Uloen lengkapi meusen yamaha

Keu bapak guru loen bi sertifikasi
Bus sekolah loen bi keu aneuk sikula
Pedagang kaki limong jeut meukat meriti
Lam kota idi punoh bak jalan raya

Ke rakyat nangroe nyang tem metani
Traktor uloen bi ngen bijeh lada
Keu pak nelayan jareng ulon bi
Nibak TPI cool strorage sedia

Menyan keu haba bak keude kupi
Calon bupati nyan janji ka geuba
Yoh goh teupileh geupugoet janji
Supaya jibi gobnyan suara

Oh lheuh teupileh kagadoh janji
Proyek pih geubi keu urueng kha-kha
Di apa gampong ka korban janji
Bak warung kupi gop nyan geusaba

Teuduk te tahe saboh glah kupi
Geu nonton tv babah teubuka
Nonton berita keubhah korupsi
Berita bupati tamong penjara